WISATA ETNIK CINTE BETAWI |
| Waktu | 23 Oktober · 8:00 - 20:00 |
|---|---|
| Tempat | Situs Batu Jaya (Karawang) & Makam Syeh Quraa (Lemah Abang) |
| Dibuat oleh: | |
| Info Selengkapnya | Assalamualaikum wr. wb, Buat semue : ~ nyang Betawi, ~ nyang cinte Budaye Betawi ~ atawe nyang pengen tau lebih jauh tentang Betawi, Sebelonnye, aye pengen kutip dulu pernyataan dato Ridwa Saidi. Katanye gak ade data dan peninggalan sejarah yang bisa jelasin asal-usul suku Betawi, sampe akhirnya muncul situs Batu Jaya nyang merupakan peninggalan dari krajan Salakanagara. Dari naskah Wangsakerta diungkap, krajan Salakanagara ini didiriin awal abad Mesehi, oleh seorang jado dari kali Tirem nyang bername Aki Tirem. Kisahnye, kali Tirem dulu jadi tempat perdagangan periuk dan bejana paling besar. Aki Tirem sebage penghulu kampung nyang bertugas jaga keamanan berpikir, gak mungkin die sendirian ngelawan para bajak laut nyang sering bikin onar. Die perlu nyang namanye sistem kekuasaan (nagara). Dari situ terus dia bangun sistem krajan (bukan ke-raja-an) nyang selanjutnye disebut krajan Salakanagara. Batu Jaya bisa aje dianggep candi dalem konteks Hindu-Budha. Tapi batu Jaya sebenernye bukan candi melainkan kabuyutan dalam konsep sistem kepercayaan lokal. Diantara 24 situs Batu Jaya ada tiga bangunan terbesar nyang dikelilingin kolam, yaitu Unur Serud, Unur Blandongan ame Unur Jiwa. Nyang masih terus jadi perdebatan dari situs ini ampe sekarang, disatu sisi para arkeolog ngakuin bahwa situs ini berasal dari peninggalan abad II M. Tapi di sisi laen mereka ngotot kalo tuh situs peninggalan Hindu-Budha. Padahal jelas-jelas Budha dateng ke sini abad ke VII M, dan Hindu lebih belakangan lagi. Tapi di sini kite bukan mau ngomongin perdebatan itu. LKB ame Forum kajian Budaya Betawi mau ngajak sodare-sodare nyang kepengen tau situs nenek moyangnye kite-kite. Nyok..., kite piknik ke sono. Dari situs nanti kite lanjut ziarah ke makamnye Syeh Quraa. Beliau adalah salah seorang penyebar Islam di Nusa kalapa nyang dateng dari Champa. Nah, buat nyang mau ikutan, daftar aje lewat SMS ke nomer: 021.31718790, terus transfer ke rekening BCA KCP Cikarang, no: 3430839933, a/n. Cici A. Ilyas. Biayanye cuman Rp. 150.000,- udeh termasuk: - Transport pergi-pulang - Makan siang - Snack - Buku tentang situs Batu Jaya - Cindramata berupa kaos dari LKB Kumpul di gedung Nyi Ageng Serang, Kuningan pk: 07.30 WIB Berangkat 08.00 WIB Jangan ampe ketinggalan ye.... Lantaran pesertanye dibatesin cuman 75 orang. Kite tunggu, deh! Wassalam Panitia S: F-KJ |
Tidak ada komentar:
Posting Komentar